Энэ амьдрал, энэ нийгэмд харамсаад барахгүй олон зүйл байх болжээ. Би гэдэг хүн хүн чанар, сэтгэл байхад аль ч нийгэмд амьдраад, ямар ч үед өөрийнхөө хүрээлэлийг бий болгоод байж болох байх гэж боддог хүн. Хүн болгон л амьдрал мөнгөн дээр тогтдог гэх үзэл сурталд хүссэн ч хүсээгүй ч нэгдсэн өнөө цагт миний бодол надда л зөв байдаг. Мэдээж "мөнгө" гээч цаас амьдралд хичнээн хэрэгтэй, амьдралыг хичнээн баялаг болгодог ч гэлээ би хэзээ ч өөрийнхөө үзэл бодлын дээр жагсааж байсан удаа байгаагүй ээ.

Хичнээн баян тансаг болсон ч, хичнээн их мөнгө хүүлдэг болсон ч хүн хүн шиг байж, сэтгэл зүрхээ, хүн чанараа алдахгүй байгаасай гэж их хүсдэг. Гэтэл энэ нийгэм арай биш ээ. Баян хоосоны зааг ихсэх тусам хүн гээч амьтаны зан авир өөрчлөгдөж, мөнгө гээч цаасны төлөө юу ч хийхэд бэлэн байх "робот" болсоор л ... Хүн гэдэг уулаасаа нийгмийн боол байсан, байсаар ч байх болно. Тийм болохоор нийгмээ дагаад хувьсан өөрчлөгдөх нь зүй ёсны  л процесс байх нь тийм үү? Төрсөн өдрийнх нь бэлгийг авах бололцоогүй ч гэсэн тэр сайхан өдрөөр нь утсаар яриад баяр хүргэх  найзын сэтгэл, бохь аваач гэх тэр жаахан охины хөдөлмөрийг үнэлэж дургүй ч гэсэн тэр хүүхдэд буян болох 1000 төгрөгний бохь авч байгаа тэр хүний хүн чанар, өдөр болгон утсаар ярьж амар мэндийг нь мэдэх үрийн сэтгэл, хэзээ ч хамтдаа бүхнийг давнаа гэх ханийн итгэл өнөөдөр МӨНГӨӨР үнэлэгддэг болжээ. Харамсалтай биш гэж үү?

Сайн найз байхын тулд төрсөн өдрөөр нь ТОМ бэлэг авч өгөх, мөнгөн тусламж өгч байж ХҮН ЧАНАРтай хүн нэрийг зүүж, ар гэрээ мөнгөөр таслахгүй байж САЙН ХАНЬ болох, үргэлж сүүний мөнгө өгч байж аав ээжийн САЙН ҮР нь байх нь энэ нийгмийн "шалгуур" юм гэж үү? Өөрөөр хэлбэл ТӨГС ХҮН байх их амархан юм байна. Мөнгөтэй л бол. Тэгвэл та хэний ч хувьд ТӨГС байх болно.

Зиа зиа явж мөнгө олох уу даа.